1Cor 2 | DOB | STEP | Tasigwao, wanuwa'i'isi tuta nina lowa Yaubada tetelina yame'ena ga yasimanena 'emiya, nigeya 'aene 'abo'agu tosinasinapu sinabwana,

1 Corinthians 2

Paulo 'ina loguguya

1 Tasigwao, wanuwa'i'isi tuta nina lowa Yaubada tetelina yame'ena ga yasimanena 'emiya, nigeya 'aene 'abo'agu tosinasinapu sinabwana, 2 ta esi nuwanuwagu be Yesu Keliso namo manuna yada loguguya 'emiya, tauna siloemwawasina kelose 'enaya. 3 'Enega 'igu apwesa 'emiya 'atuwa toneneta, ta ma igu dedela be ma igu 'atesa'ala, 4 ta wate 'igu loguguya 'emiya nigeya ona waiwaidi nai mwalatoi 'ediyega, ta esi Yaluyaluwa Tabuna 'ina waiwaiyega. 5 'Enega 'igu loguguya nina wanonona ga waemisena 'aene nigeya tomota 'idi mwalatoi 'enega, ta esi Yaubada 'ina waiwaiyega.

Mwalatoi 'ai'aila

6 Mwalatoi 'ai'aila Yaubada 'enega yasimasimana toemisa pa'alidi 'ediya, ta sa'i bale'u gete 'ana mwalatoi nai toloinao gete tuga 'idi mwalatoi sawasawalidi tuga, 7 ta esi mwalatoi nina Yaubada 'enega lowa kwaikwaiyina, ta gete tuga ni'atu 'igie apwesenama. Manuna muliyega be bale'u 'imweluluina, nugana nuwanuwana be 'ida 'ebe gwausowala nina 'ida 'ebwa'eda. 8 Ta bale'u gete 'ana toloinao mwalatoi nina nigeya simwalamwalatoni, ta 'eguma nai sida gimi mwalatonina, geya'abo sa'i 'ida 'Inapwana galewega sida loeloemwawasi kelose 'enaya.

9 Ta esi 'ida gwausowala nina manuna Buki Tabu 'ina simana 'igwae,

“Geya'abo tagwaegwae Yaubada 'ana toobobomao 'adi lema bobo'ana manudi 'igibubuna,

manuna gete tuga nigeya 'ebweu wate tomota 'i'ita'ita, nai 'inonono, be 'ida nuwa sabwalena lema nina bobo'ana wawasae.”

10 Ta esi Yaluyaluwa Tabuna 'enega Yaubada mwalatoi nina ni'atu 'igieapwesena 'edaya, manuna Yaubada Yaluyaluwana yage maibo'ana 'imwalamwalatonidi, 'enega Yaubada 'ina nuwanuwa kwaikwaiyidi wate 'imwalatonidi. 11 Tada nuwa'i'isi 'abo'ada tomota, manuna 'abo yaita tai ma ina nuwanuwa kwaikwaiyina, tai nina tauna yaluyaluwana 'imwalamwalatoni. Nadigega wate Yaubada Yaluyaluwana taunamo 'ina nuwanuwa 'imwalamwalatoni. 12 Yaubada yaluyaluwana nigeya me bale'u yaluyaluwadi nadigega, ta esi Yaubada yaluyaluwana nina 'i'ebwa'eda, 'enega tanuwanuwa sabwalena 'ina obobomao 'edaya manudi.

13 'Enega 'ida ona nai 'ida e'ita nigeya me bale'u 'idi mwalatoi 'enega, ta esi Yaubada yaluyaluwanega, 'enega yaisigedi taudi yaluyaluwa nina 'ediya 'imiyami, sawesawediya be ona nidi sinonodi, ta wate simwalatonidi. 14 Ta esi 'abo nigeya, geya'abo sa'i simwalamwalatoni, manuna 'ediya 'aene yage kabakabaleya tuga. 'Enega nigeya sawesawediya be yage nidi simwalamwalatonidi, manuna Yaubada yaluyaluwana geya'abo 'igiegienuwa sabwalenidi. 15 Ta esi 'abo'ada yage maibo'adi tamwalamwalatonidi, to'ase bobo'ana ta to'ase to'umalina, 'enega nigeya 'ebweu yaita sawesawenaya be 'i'awa to'umaliyeda.

16 Ona'ai'aila, nigeya 'ebweu yaita Yaubada 'ina nuwanuwa 'imwalamwalatoni be 'aene 'ida e'itena, ta 'abo'ada esiya Keliso 'ina nuwanuwa 'enega tanuwanuwa.